قالك انا هزودكوا 30 % علاوة و هزنجفكوا يا شعبي الحبيب و الأشية هتبقى معدن و العيشه هتبقى لوز و طلعوا علينا من أخبار اليوم على لسان ممتاز العرص (قصدي القط) بيقول ” اتدلعنا في عهدك يا ريس ” و أمي رقصت و طلعتلي لسانها و قالتلي اهو حسني اللي بتشتمه ليل نهار زودنا 30 % يعني المرتب هيزيد 99 جنيه و 44 قرش و هتبقى العيشة لوز … 48 ساعة و تبدأ الأخبار تنتشر عن عدم وجود موارد كافية لتوفير الزيادة في المرتبات و التي تتطلب 12.5 مليار جنيه , طبعاً أمي و أمثالها من الموظفين الحكومين اعتبروا اني بروِّج لإشاعات و اني فقط عايز اشوه صورة الرأيس ( قال يعني هو ناقص هو مًشوَّه خلقة اصلاً). بس هوب إذ فجأةً نلاقي نظيف طالل علينا من فوق بيعلن قرار الحكومة برفع سعر المحروقات من الوقود بنسبة 40% للسولار و 30% للبنزين و رفع اسعار السجاير 20% لتوفير العلاوة التي وعد بها مستر بريسيدنت عشان ” يدلَّع ” شعبه الحبيب … خلاصة القول أحا !!!

بس انا ليا كام سؤال لمستر بريسيدنت عشان هو عارف انا بحبه قد ايه :

سعر لتر البنزين ال 95 بقى 2.5 جنيه مصري بواقع دعم 1.5 جنيه لكل لتر من ميزانية الدوله سؤالي هو البنزين ال 95 بدين امك ينزل عليه دعم ليه ؟ هو البنزين 95 دا مين مستخدمينه ؟ نواره مثلاً بعربيتها اللي قسطها 400 جنيه في الشهر ؟!!

البنزين ال 95 للعربيات المرسيدس فئة ” S ” و ما شبه ذلك يعني العربيات اللي سعة محركها فوق ال 2000 سي سي و سعرها بأي حال من الأخوال لا يقل عن 250 الف جنيه, واحد راكب عربية على الأقل ب 250 الف جنية يستفيد من الدعم ليه ؟؟!!! و صدقوني دا مش حِقد طَبقى بس استفسار لأن الجنيه و نص دعم للبنزين ال 95 لو اتوجهوا للسولار و البنزين مكانش هيكون فيه مشكلة ..

حاجة كمان … حسني .. هو حد قالك انك صايع و حاكم شعب اهبل ؟ احنا ممكن نكون طيبين , سكرانين , مغفلين , إنما مش هِبل يعني بتديني باليمين 30 % علاوه على المرتبات و تسحب بالشمال 40 % غلاء في الأسعار زيادة اكتر ماهي اصلا غالية و مش ناقصة !!! في حد بعت على تويتر بيفسر اللي بيحصل بأن ” الحكومة قاصده تعمل كدا عشان تساعدنا و تسخن الناس عشان الثورة تقوم و البلد توله قوم ايه بقى ؟ قوم هما ياخدوا الفلوس و كل حاجه و يهربوا على برا في وسط الزحمه ” … فكره برضك !!!

سؤال بقى خلاني اتأكد من انهم فعلا بيستفزوا الناس عشان تَثُور … السجاير الكلوبترا تم رفع سعرها بواقع 20% يعني زادة حوالي نص جنيه , معروف ان السجاير الكلوبترا و بغض النظر عن كونها سجاره غير آدمية هي مصدر النيكوتين للطبقة الكادحة المفشوخه من الشعب يعني عمال التراحيل و عمال الأرزوقيه و الفلاحين و عمال المصانع و الموظفين ايضاً … النص جنيه دا يفرق قوي قوي معاهم و انا واحد منهم النص جنيه اوقات كتير بيفرق معايا قوي قولولي بقى هما قاصدين يثيروا الطبقة دي ؟ طب هو مستر بريسدنت عايز مننا ايه ؟ نواره بنت ابويا نجم ياعني باتت طول الليل تتقلب مش عارفه تنام ولا فاهمه اللي هو بيعمله دا ايه و ليه لحد ما وصلت للمسمَّى الصحيح …

طيب ايه الحل او ايه الرد على تصعيد مستر بريسيدنت للموقف لسه مش عارف بس الجميع في حالة تفكير لتحضير الرد المناسب …

*العنوان مستوحى من …