من يومين اعلن العمال في لبنان ان يوم السابع من مايو سيكون يوم إضراب عام عن العمل لتحقيق بعض المطالب المتعلِّقة برفع الحد الأدنى و تحسين اجور العمال , يعني التحرك من الأصل تحرك عمَّالي بمطالب عمَّالية لا علاقة له بأي نزاعات او مطالب سياسية … الأخبار عن إضرابات عمَّالية بشكل عام بتدخل على قلبي البهجه بتحسسني ان في رجّاله بجد بتُطالب بحقها ولكن تحدث المفاجأه بسماع بعض الأخبار عن تسلل شباب مُسلحين وسط العمّال المُضربين و تراشُق ببعض الطلقات النارية في الطرقات و نزول الجيش ( نفسي اعرف الجيش نزل يعمل إيه لأن حسب ماشوفت في الصور و قال شهود عيان انه مبيعملش حاجه و بيتفرج ) و رجال حزب الله يحاولون السيطرة على الموقف و تهدئة الشارع بشكل او بآخر لتخرج النقابة العمّالية مُعلِنة ان الإضراب تم تعليقه و الغاء المسيرة العمّالية في شوارع بيروت و ان العمّال ليسوا طرف بأي شكل من الأشكال بالنزاعات الطائفية التي تدور في طرقات بيروت … دا مُلخص بسيط للي حصل اليوم في بيروت و اللي تداعياته لاتزال تحدث حيث ترد اخبار عن دويّ مدفعيات في بيروت و تجاهل إعلامي غير مُبرر للأحداث !!!

الصور السابقة من تصوير الرفيقة كارول كرباج

الصور السابقة من تصوير الرفيقة فرح كوبيسي

المفارقة الغريبه بقى و اللي بجد بقف قدّامها و اتنّح عشان احاول افهم … الشعب المصري مشكلته الرئيسية و الأولى و الأخيرة تكمن في حاجة واحده اسمها “الوعي” حط جنب كلمة الوعي دي بقى اي حاجه هتلاقيها ناقصة عندنا ” وعي .. سياسي , مجتمعي , جنسي , إقصادي … ” وكل انواع الوعي بتكِّمل بعضها للوصول للمجتمع الأمثل , ولكن اللي يهمني في كلامي دلوقتي هو الوعي السياسي , عندنا في مصر في حالة إنعدام وعي سياسي لاقبلها و لا بعدها الكل مُهمِل الوعي السياسي بحجة ان اكل العيش صعب و اهم و مفيش وقت للسياسة و الكلام الفاضي دا !! مع ان السياسة و لقمة العيش وجهان لعملة واحده و كلّما قلّ الوعي السياسي للمجتمع باتت فرصة الحصول على لقمة العيش اصعب ..!!

أما الشعب أو المجتمع اللبناني بقى العكس عنده وعي سياسي لامؤخذه زياده حبتين يعني الوعي السياسي عندهم اكتر من اللي يحتاجه مجتمع عشان يعيش في استقرار سياسي , الشباب هناك بيفهم و بيحب السياسة زي حب الشباب المصري وعبقرية الشباب المصري في فهم كرة القدم , ولكن للأسف مع الوعي السياسي الزائد دا من وجهة نظري هناك حالة من التَبَعية و الأنشقاقات , يعني لبنان المعارضه هناك متفرقش عن النظام الحاكم الأتنين بينهم و بين اللبنانين أزمة ثقة بالعكس اللي خالق المشكله هي طوائف المعارضه اللي ساحبه وراها مجموعة من الشباب المتحمس خالقة طائفيه و تشدد وسط مجتمع الشباب فبيكون النِتاج الطبيعي للأسف هو الأحداث الجاريه الآن ..

انا واحد من الناس اللي لبنان -و على الرغم من اني لم يسبق لي ان ازورها- ولكنها دائما كانت تشكل لي إحساس بالدفئ يمكن السبب في تكون هذا الإحساس هو صوت فيروز الدافئ و بعض الأصدقاء اللبنانين المقربين إلى قلبي …

بعتقد ان الحل الأمثل للمشكلة اللبنانية و المشكلة المصرية هي اننا نحط المصرين و اللبنانين في الخلاط و إضرب يا معلم !! يذوب الوعي اللبناني مع اللامبالاة المصرية و الصياعه المصريه مع الإنفتاح اللبناني و شوية حجات من هنا على من هناك يطلعلك مجتمع عمُوله و زي الفل !!!