و انا قاعد زهقان في ليلة صيف حاره و الرطوبه عاليه , قولت ادخل يوتيوب اتفرج كدا على اي حاجه بقلب لاقيتني بتفرج على فيديوهات اغتيال السادات و بعض التحليلات للحادث , اللي لفت نظري حاجه مهمه جدا , مبارك كان قاعد جنب السادات يعني لازق في الكرسي اللي جانبه … السادات لبس 37 طلقه و حسني طلع زي الفل ولا فيه خدش يوحد ربنا … يمكن ظهر في حلفان القسم رابط ايده بس طلع منها زي الفل - للأسف يعني – طيب الراجل البطل الإسلامبولي ضرب السادات هو و اللي معاه بكلاشن روسي او من مصانع المعادي ايا كان يعني و المعروف عن السلاح دا ان دقّته مش عاليه يعني لما تضرب على هدف خصوصا و انت في وضع تصويب صعب زي اللي كان متخذه الإسلامبولي و تضرب على الهدف 30 طلقه -و اللي هي خازنة الكلاشن العاديه- يصيب الهدف بالكتير قوي 25 منهم و لازم هيكون في 5 على الأقل طايشين يجوا يمين يجوا مبارك اي حاجه يعني !!!

إنما انور ياخد 37 طلقه و حسني يقوم بجسمه فاضي كدا دي فعلا عجيبه و لا اعتقد انها ممكن تتكرر ابداً . انا مش بتكلم بمنطق نظرية المؤامره و ان حسني ممكن يكون كان على علم مثلا لأ دي حقائق المنطق بيقول ان حسني كان لازم يلبس اي طلقه انشاله اصابه خفيفه يغزي بيها العين يعني بس لأ !!

كمّلت تقليب في يوتيوب وقعت على تسجيل للقاء مبارك اللي اذاعوه في 1995 بعد عودة مبارك من اثيوبيا و محاولة اغتياله هناك و هو بيحكي … انا مش هنسى يومها و كان عندي 10 سنين و كنت بتفرج (مع العِلم اني في الأيام دي بابا حسني و ماما سوزان كانوا حبايبي و دي نتيجه لأني اتربيت على ثقافة القناة الأولى و الثانيه) انا فاكر حسني كان بيشرح و بيقول سمعت طقطقه في البيبان كام رصاصه دخلت في الصاج و وقفت و عادي انا كنت هادئ و قولت للسوّاق لِف و ارجع لاقيت قذيفه انضربت على سقف العربيه بس اخترقت الصاج و منفجرتش يعني عادي و قولت للسواق لف و روح بينا على المطار و ركبت و جيت بالسلامه و عادي يعني و انا فاكر كان بيتكلم ببرود …

تفتكروا ان من الطبيعي ان الحجات دي تحصل يعني ممكن الواحد يكون ابن محظوظه بالشكل دا ؟ كل شئ بأمره و الأعمار بيد اللي خالقها و كل الكلام الجميل دا بس مش كدا … تفتكروا هيموت في يوم من الأيام ؟؟!!