المخدرات حلوه … بس هتدمرك
ايوه المخدرات حلوه!!! مفيش و لد او بنت … راجل او ست … في اي رقعه على سطح الكوكب بتعنا دا يقدر ينكر ان المخدرات حلوه, قرأ عنها او سمع او حتى جربها . المخدرات بتقدر تنقلك من عالمك المزعج الملئ بالضجيج لعالم بمبي بمبي بمبي حاله كده من صباح الفل تتمنى تعيشها دائماً … تبقى المخدرات حلوه.
ولكن مفيش حلاوه منغير نار “يابرنس” يعني عايز الدماغ البمبي دي يبقى لازم تدفع تمنها … تفتكر انك تقدر ؟؟
فلوس يعني ؟
ياريت التمن هو تمن مادي فقط و لكن التمن اللي هتدفعه مقابل الدماغ دي هيكون اكتر و اغلى من مجرد فلوس مع العلم ان العام الماضي حجم الاموال اللي تم تداولها في سوق المخدرات المصري 27 مليار جنيه ( ولا عزاء لمحدودي الدخل )
امال ايه صحتي يعني ؟
صحتك … دانت “هتتفشخ يابرنس” بدون مبالغه فعلاً و اول علامه للفشخ هتظهر عليك هو السواد اللي تحت عينك و اللي بيزيد مع كل جوينت او حبَّايه او سطر بتسنفُّه و الاضرار بقى حدِّ و لا حرج من امراض صدر و موت خلايا في المخ ( دا اللي بيقوم بيه البانجوا ابو 10 جنيه الورقه ) , و ايضاً الضرار الجانبيه اللي بتأثر على نفسية متعاطي المسكنات من كونترمال و ترامادول و سلسلة المسكنات و المهدئات اللي هتنسف حياتك الاجتماعيه و مرحباً بالانطواء و الانتهاء بالرمي على الرصيف متأثراً بالاوفر دوز و أهو كلب وراح لامؤاخذه
للعلم دا مجرد جانب بسيط جداً من الاضرار اللي بيتعرضلها الضرِّيبه في بلادنا الحبيبه, كان نفسي اقول على نقطه مهمه جداً و هي عن مدى حرمانية تعاطي المخدرات و الغياب عن الوعي و لكن النتعاطي للمخدرات بيكون مُخَدَّر فلا تجد امل من الكلام عن الحلال او الحرام لان الضمير متخدَّر , فبيغيب الاحساس بالضمير الديني او بوجود رقيب لكل عمل بتعمله .
كتير فكَّرت ان كمية المخدرات الرهيبه اللي بتدخل البلد دي و بتوصل بالسهوله دي ليد الضرِّيب لايمكن تكون بتحصل و الحكومه ياعيني غلبانه مش عارفه تسيطر عليها , و كتير اقتنعت ان دي سياسة دوله خدَّر الشعب يتبسط بالوهم يبقى عمره مايخرج في الشارع يعلي صوته و يقول لأ ( يمكن فكر المؤامره مسيطر على تفكيري بس دا فعلاً اللي بيحصل )
دي المخدرات … حلوه … بس مستعد تخسر حياتك و تعيش آخر عشر سنين من عمرك في العنايه المركزه دا لو فضل معاك فلوس تدخل بيها مستشفى ( دا لو كنت محظوظ و لم يقابلك عزرائيل في يوم زودت فيه كمية الضرب ) ؟؟ لو مستعد خلاص دا إختيارك انت و انت مسؤول عنه .
بس لو مش مستعد ان تعرض نفسك لكل هذه البلاوي يبقى تشاركنا حملتنا …
لو تعرف تاجر او موزع مخدرات في المنطقه اللي ساكن فيها او صيدليه بتبيع مسكنات الجدول ( الكونترمال , الترمادول , الترمايدين ) ابعتلنا رساله على البريد الالكتروني ده tw3ya@hotmail.com
و إحنا هنتصل بمكتب مكافحة المخدروات و نمدهم بالمعلومات الدقيقه و هنتابع تحركهم و المحاضر اللي هتتكتب … لمتابعه اكتر لآخر المستجدات و المشاركات زور موقع حملة توعيه
ياحبيبي مهما عملنا حملات المخدرات هتفضل موجوده عايز تقول لشاب ضايع لا مستقبل ولا حياه كريمه بطل المخدرات طيب يبطلها وهنديله مكانها ايه. عندنا أيه ممكن نديهوله مفيش غير الكلام الحنين الجميل بتاع صحتك بالدنيا ونصيحه اوعى تبلغ مباحث المكافحه في منهم شغالين في السوق
سلام يارفيق
المخدرات هو ما يصبر الناس فى مصر عن مواجهة الواقع وبالتالى الثورة .
مجهود جميل . انا ممكن اتكلم عن تجربتى الشخصية فى المجال دة بس هل فى اى اخطار قانونية .
الله موضوع جميل قوي اعتقد ان اي حد يقراه والله يبطل
الي الامام يا يساري
تحياتي
أنا بحب و بحترم الفيلم القصير ده لعمرو سلامه و إختيار الأسم كان موفق فيه جدا و الحمله دى من أول ما نزلت و أنا بحترمها أوى و لو عايزين أى مساعده أقدر أقدمها يا ريت اشارك
شكرا يا يسارى